Beat Blum-Wenger

von Erlenbach, in Därstetten, Mösli

geb. 19.9.1969; gest. 3.8.2023

Lebenslauf Beat Blum

Am 19. September 1969 isch Beat im Spital ds Erlebach aus Zweitjüngschte uf d Wält cho. Är isch mit sine Eltere Dori und Chlous Blum u mit de Gschwüschterte Hansjürg, Dani, Bluette u Anita ufeme chline Burebetrieb im Stägweidli ds Erlenbach ufgwachse.

Äs isch ä prägendi Chindhit gsi wo Beat mit sire Familie het verbracht. Im Summer isch gheute worde u im Winter isch är lidäschaftlich gärn a Laser ga schiifahre. Är het jedi freie Minute uf dä Schii verbracht.

Mit Nüni isch är mit sim eltere Brueder Daniel als Statterbueb im Ramsli gsi. Das isch äs blibends Erläbnis gsi für die Beide, ds Ställi wosi drinn si gschlafe, stiht ging no. Sehr iischninend isch o dr Schiiunfall im Winter druf gsi, wo Beat ufere rasante Fahrt frontal mit emne fahrende Pistefahrzüg isch kollidiert. Äs riese Glück het är denn ka. Miteme Oberschenkelbruch isch är fasch 10 Wuche im Spital Erlebach gsi, wo är jede Tag him ids Stägwidli het gseh.

Im Jahr 1982 isch d Familie uf Entschwil im Diemtigal, ids elterliche Him vor Dora züglet. Mit dem Umzug, u o ir Schuel het Beat am Afang Müehi ka. Aber mit der Zyt het är sich o dert dahim gfüehlt. Nach dr obligatorische Schuelzyt het är sini Dachdeckerlehr bi Hansruedi Stucki ds Entschwil, grad ob sim Elterehus absolviert. Dert het är sehr viel Wüsse mit ufe Wäg übercho.

Nach dr RS im Jahr 1989 isch Beat ds erschte Mal zu Karl Blum uf Erlebach als Dachdecker ga wärche. Äs isch ihm sofort viel Verantwortig übertrage worde, was Beat sehr het gschetzt. Us wirtschaftliche Gründ het är dr Betrieb umi müesse verlah isch aber nach 4 Jahr im 1995 wieder zrugg zur Blum +Feller GmbH. Är het denn d Glägehit übercho, als Teilhaber i das Gschäft i ds stige.

1993 het Beat sini speteri Frau, ds Regi lehre kenne. Zemä si se ds erscht im Wasser ds Zwüscheflühe gwohnt u hi speter ds Entschwil ä Eigentumswohnung chönne chufe.

Dürt Glägehit vo Beat, sich am Dachdeckergschäft Blum + Feller GmbH ds beteilige, hi si beschlosse, uf Erlebach ds zügle.

Im 1999 hi di beide ghürate u zwü Jahr speter ds Dachdeckergschäft ganz übernoh u zemä witergfüehrt. Ä chli speter isch du da drus d Blum Gebäudehüllen GmbH worde.

Scho lang isch klar gis, dass di beide äs igets Huus wi boue u im 2004 isch dä Troum ds Därstette i erfüllig gange. Beat het sehr viel Härzbluet u eigeti Arbeit i dä Neubou gsteckt u entsprechend gross isch d Früd gsi, wo im Herbscht 2004 dr Izug isch bevorstande.

Dür d Geburte vo dä beide Chind Nico u Ladina i de Jahr 2006 u 2008 isch ds Glück vo Beat u em Regi perfekt gsi. Beat isch wahnsinnig stolz gsi uf siner beide Chind u het ging sehr viel Zyt mit ihne verbracht. Jedes Hobby vo ihne het är mit viel Isatz u guete Ratschläg understützt.

Obwohl dass ihn sis Gschäft sehr het gforderet u viel Arbit isch agstande, het är ki Wettkampf vo ihm vo de Chind verpasst. Sini Familie het är über alles gliebt u alles für se gmacht. Dass är am Abe ohni sech abzmelde eifach nid zur Zyt weh Him cho, hets nie geh. Är hets gnosse bi sire Familie ds si.

I aller Herrgottsfrüehi isch är mit a d Skirenne vo Nico u dr Ladina und speter mitere riese grosse Liedeschaft a d Schwingfest vo Nico, wo är ihn immer mit guete Ratschläg het understützt. Jedi Ritprüefig vor Ladina het Beat mit grossem Interesse mitverfolgt u Früd ka, wie sini Tochter di Ross beherrscht.

A de freie Wucheend u i de Ferie isch di ganzi Familie viel ds Bärg u im Winter ga Schiine oder Langlüfle. Wunderschöni Bekanntschafte mit anderne Familie si da entstande, wo mengi lustegi Rundi isch ds stand cho. Viel himer glachet us eifach gmüetlech ka. Beat het das alles immer sehr gnosse.

Mitem Bou vo dr neue Lagerhalle ds Erlebach 2019, isch für Beat ä witerere grosse Troum i erfüllig gange. Endlich het är Platz gnue ka für sis viele Grüst ds versorge u sich ä grossi Wärchstatt izrichte. O da het är nebst de loufende Arbite vieli Stunde dri investiert. Aber d Früd über sini neui Halle het ihn für vieles entschädiget.

Im gliche Jahr het är a sim Hinderchopf uf ds Mal äs grössers Muettermal entdeckt. Wiu är aber sit 10 Jahr nacheme Melanom am Arm, i regelmässiger Hutarztkontrolle isch gsi, het ihn das nid so beunruehigt.

Leider het du dr Arztbsuech äs anders Resultat a Tag bracht. Äs isch tatsächlich wieder äs Melanom, schwarze Hutkrebs, gsi. Beat het sich ir Insel ere Operation mit vielne Untesuechige müesse unterzieh. Dert isch ihm dä Tumor u o Lymphknote entfernt worde. Gross isch d Erlichterig gsi, wo dr Bschid isch da gsi, dass di Lymphknote nid befalle si.

Beat u di ganzi Familie het chönne düri schnuufe. Är isch jede Tag mit viel Früd i sini neue Bude u het umi chönne Vollgas geh. Sigis bir Arbit oder bi sini Hobbies wo är sich sportlich o ging umi voll het usgeh. Haubi Sache hets für Beat nid geh. Wäder bim Wärche no bi de Hobbies.

Äs Jahr nach dr Schockdiagnose hi d Ärzt ir Insel ä gschwollene Lymphknote am Hals entdeckt. Dr Chrebs isch leider zrugg gsi u sofort si ihm uf der rächte Halssite alli Lymphknote entfernt worde u är het sich anschliessend are Immuntherapie müesse underzieh. Die het är zum Glück guet vertrage u isch aube nach der Therapie direkt umi ga wärche. Jammere het me ihn nid ghört. Är isch froh gsi, wenn är aube d Ärzt umi isch los gsi u i sire Umgebig het chönne si.

Ds Jahr druf isch wieder äs Tumorrezidiv am Hals derzue cho, was bedütet het, dass die Therapie woner ging noh het ka, nüt het gnützt. Mitere witere Operation isch im o dä Tumor wieder entfernt worde.

Während dere belastende Zyt het Beat immer gwärchet u da mengä Schutzengel ka. Dank sire flinke Art, het är vor zwüne Jahr usem Pick-up chönne springe, wo dä ar Zügegg ids Rutsche isch cho u ersch im Wald unne are Tanne zum Stilstand isch cho. Mit Humor het är die ganzi Sach gno u gmint, « är het mi no nid wellä, i ha anschinend no chli Zyt hie bi euch».

Nachem grosse Hagelwätter im 2022 isch Beat so richtig im Element gsi. Überall isch är ga hälfe u het organisiert. Lengi Tage het er ka u mengisch isch am Limit gwärchet worde. Wie o denn, wo är bim Flicke vome Hagelschade mit sim Mitarbiter dür ds Dach achi gstürtzt isch. Zum Glück isch d Landig ufem Heustock denn weich gsi u är het ussert ame Schock u äs paar Blessure kiner gröberi Verletzige ka.

Beat het sich i dere Zyt sehr fit u voller Energie gfüehlt.

Leider het die jährlechi CT-Untersuechig im August äs anders Bild zigt. Äs isch us cho, dass Beat im ganze Körper Metastase vom Melanom het. Ä Wält isch zemä broche. Dr fit u energiegladeni Beat söll totkrank si?

Sofort isch mitere witere, sterchere Immuntherapie gstartet worde. U witer wärche isch da nimme gange. Die Therpapie het heftegi Nebewürkige ka. Beat het au siner Aufträg, wo är so gärn hätti usgfüehrt, müesse absäge. Ä schwierige Moment isch das gsi für ihn, nebscht der belastende Diagnose. Ä grossi Hilf isch ihm denn o d Undersützig vo sim Dachdeckerkolleg Christoph Gfeller u er Zimmerei EB Gafner ds Erlebach gsi, wo ganz sälbstverständlich agfangeni Ufträg für ihn hi fertig gmacht.

Über Wiehnachte het Beat die Therapie underbroche will är eifach no mit sire Familie ohni Beschwerde het wellä Wiehnachte fiire u mit dä beste Fründe dr Silvester ufem Nüegg wellä gniesse. Das isch ihm o würklich glunge. Mier alli hi denn ä wunderschöni Zyt ka mitenand.

Im Januar vo dem Jahr isch us cho, dass o die Immuntherapie, trotz heftige Nebewürkige, ki Erfolg het bracht u mier üs alli müesse druf istelle, dass mier i absehbarer Zyt ohni üse gliebt Beat, üse Päpu, wärde müesse witerläbe.

Zum Glück het sich der Verlouf für churzi Zyt no positiv zeigt, u mier hi alli mitenand d Konfirmation vor Ladina dörfe fiire, wos o Beat no einigermasse guet isch gange. O bim Schuelabschluss vor Ladina isch är mit Früd u Stolz derbi gsi, obwohl dass ihn denn dr Chrebs scho rächt het plaget.

Zuesehends isches Beat ging schlächter gange. Dank dr Understützig vo dr Frou Jöhr, vor palliative Spitex, het är aber immer i sim Dahim, u bi sire gliebte Familie chönne si, wo är am 3. August, nach so vielne kräftezehrende u belastende Operatione u Therapie, i Awäsehit vo sine Liebschte friedlich u ohni Schmerze für immer het chönne ischlafe.

Beat het bis am Schluss gäg sini schweri Chrankhit kämpft. Wiu är we gärn no chli bi üs blibe. Leider isch si Durchhaltewille u Kampfgeist hie nid belohnt worde.

Bis ds letscht her är aber ging umi gsit: I ha äs wunderschöns Läbe ka

Beat, mier gönne dier dini Rueh, vermisse dich aber unendlich.

Regina, Nico und Ladina Blum